தற்கால பெண்ணியமும், சவால்களும்!

சண்சியா வரதராசன்,
ஊடகக் கற்கைகள் துறை,
யாழ்ப்பாணப் பல்கலைக்கழகம்.

பெண்கள் நாட்டின் கண்கள்” என்று மகாகவி பாரதியால் போற்றப்பட்ட பெண்கள், இன்றைய நவீன சமுதாயத்தில் எத்தகைய நிலையை எட்டியிருக்கிறார்கள் என்பது ஆராயப்பட வேண்டிய அம்சமாகும்.

பல நூற்றாண்டு கால அடக்குமுறைகள் மற்றும் சமூகக் கட்டுப்பாடுகளைத் தகர்த்தெறிந்து, இன்று பெண்கள் கல்வி, பொருளாதாரம், அரசியல், அறிவியல், கலை எனப் பல துறைகளிலும் ஆண்களுக்கு இணையாகச் சாதனைகள் படைத்து வருகிறார்கள். அவர்களின் முன்னேற்றம் பிரமிக்க வைக்கிறது என்றாலும், முழுமையான சமத்துவத்தையும் பாதுகாப்பையும் அடைவதற்கான போராட்டங்கள் இன்னும் தொடர்ந்துகொண்டுதான் இருக்கின்றன.

மனித சமுதாயத்தின் அடிப்படை அலகாகக் குடும்பம் விளங்குகிறது. அந்தக் குடும்பத்தின் மையமாகப் பெண் திகழ்கிறாள். தாய், மகள், மனைவி, சகோதரி எனப் பல்வேறு வடிவங்களில் பெண் சமூக வாழ்க்கையின் ஒவ்வொரு நிலையிலும் இணைந்திருக்கிறாள். வரலாற்றுக் காலங்களில் பெண் ஒடுக்கப்பட்டவளாகவும், உரிமைகள் மறுக்கப்பட்டவளாகவும் வாழ வேண்டிய சூழ்நிலை இருந்தது.

ஆனால் காலப்போக்கில் சமூக மாற்றங்கள், கல்வி வளர்ச்சி, பெண்ணிய சிந்தனைகள், சட்டப் பாதுகாப்புகள் ஆகியவற்றின் மூலம் இன்றைய சமுதாயத்தில் பெண்களின் நிலை குறிப்பிடத்தக்க மாற்றத்தை அடைந்துள்ளது.அதே நேரத்தில், பல முன்னேற்றங்களுக்கிடையிலும் பெண்கள் இன்னும் பல சவால்களை எதிர்கொண்டு வருகின்றனர் என்பதும் மறுக்க முடியாத உண்மையாகும்.

பண்டைய சமூகங்களில் பெண்கள் பெரும்பாலும் வீட்டு வேலைகளுக்குள் மட்டுமே கட்டுப்படுத்தப்பட்டனர். கல்வி பெறும் உரிமை, சொத்துரிமை, கருத்துரிமை போன்றவை அவர்களுக்கு வழங்கப்படவில்லை. ஆணின் கட்டுப்பாட்டுக்குள் பெண் வாழ வேண்டும் என்ற மனப்பாங்கு சமூகத்தில் ஆழமாக வேரூன்றியிருந்தது. இத்தகைய சூழ்நிலையில் பெண் தனக்கான அடையாளத்தை இழந்து, பிறரின் நிழலில் வாழ வேண்டிய நிலைக்குத் தள்ளப்பட்டாள். ஆனால் சமூக சீர்திருத்த இயக்கங்கள், கல்வி வாய்ப்புகள், பெண்களின் உரிமைகளுக்கான போராட்டங்கள் ஆகியவை பெண்ணின் வாழ்க்கையில் புதிய விடியலை ஏற்படுத்தின. அந்த விடியலின் விளைவாகவே இன்றைய பெண்கள் தன்னம்பிக்கையுடன் சமூகத்தில் காலடி எடுத்து வைத்திருக்கிறார்கள்.

இன்றைய சமுதாயத்தில் பெண்களின் முன்னேற்றத்திற்கு முக்கிய காரணமாக அமைந்தது கல்வியாகும். கல்வி பெண்ணின் சிந்தனையை விரிவுபடுத்தி, அவளுக்கான உரிமைகளை உணரச் செய்தது. பள்ளி, கல்லூரி, பல்கலைக்கழகம் என கல்வித் துறையின் அனைத்து நிலைகளிலும் பெண்கள் இன்று குறிப்பிடத்தக்க அளவில் பங்கேற்று வருகின்றனர். குறிப்பாக உயர்கல்வி, தொழில்நுட்பக் கல்வி, தொழில் பயிற்சி போன்ற துறைகளில் பெண்களின் ஈடுபாடு அதிகரித்துள்ளது.

கல்வி பெற்ற பெண் தன்னை மட்டுமல்ல, தன் குடும்பத்தையும் சமூகத்தையும் முன்னேற்றும் சக்தியாக மாறுகிறாள். இருப்பினும், கிராமப்புறங்களில் வாழும் பெண்கள் இன்னும் கல்வி வாய்ப்புகள் குறைவாக இருப்பது, வறுமை, இளவயதுத் திருமணம், குடும்பப் பொறுப்புகள் போன்ற காரணங்களால் கல்வியைத் தொடர முடியாத நிலை காணப்படுவது இன்றும் ஒரு சமூக சவாலாக உள்ளது.

பொருளாதாரத் துறையில் பெண்களின் பங்கு இன்றைய சமுதாயத்தில் கணிசமாக உயர்ந்துள்ளது. முன்பு ஆண்கள் மட்டுமே சம்பாதிப்பவர்கள் என்ற நிலை மாறி, இன்று பெண்களும் குடும்பத்தின் பொருளாதாரத் தூண்களாக விளங்குகின்றனர். ஆசிரியர், மருத்துவர், செவிலியர், ஊடகவியலாளர், தொழிலதிபர், அரச ஊழியர், தொழிற்சாலைத் தொழிலாளர் எனப் பல்வேறு துறைகளில் பெண்கள் பணியாற்றுகின்றனர்.

பெண்களின் வருமானம் குடும்ப வறுமையை குறைப்பதுடன், குழந்தைகளின் கல்வி மற்றும் ஆரோக்கியத்தை மேம்படுத்துவதிலும் முக்கிய பங்கு வகிக்கிறது. ஆனால், சம வேலைக்கு சம ஊதியம் வழங்கப்படாமை, பணியிடங்களில் பாலியல் தொந்தரவு, வேலைக்கும் வீட்டுப் பொறுப்புக்கும் இடையிலான இரட்டைச் சுமை போன்ற பிரச்சினைகள் பெண்களின் முன்னேற்றத்தை இன்னும் கட்டுப்படுத்துகின்றன.
குடும்ப அமைப்பில் பெண்களின் நிலையும் மாற்றம் அடைந்து வருகிறது.

இன்றைய சமுதாயத்தில் பெண்கள் வேலைக்குச் செல்வதன் மூலம் குடும்பப் பொறுப்புகளும் வேலைச் சுமையும் ஒரே நேரத்தில் அவர்களின் மீது சுமத்தப்படுகின்றன.

இதனால் உடல் மற்றும் மன அழுத்தங்களை அவர்கள் எதிர்கொள்கிறார்கள். அதே நேரத்தில், சில குடும்பங்களில் ஆண்–பெண் சமத்துவம் வளர்ந்து, பொறுப்புகளைப் பகிர்ந்து கொள்ளும் மனப்பாங்கு உருவாகி வருவது ஒரு நேர்மறை மாற்றமாகும். ஆனால் குடும்ப வன்முறை, மன அழுத்தம், பொருளாதார அடக்குமுறை போன்றவை இன்றும் பல பெண்களின் வாழ்க்கையை இருளில் ஆழ்த்துகின்றன.

அரசியல் மற்றும் நிர்வாகத் துறைகளில் பெண்களின் பங்கேற்பு அதிகரிப்பது சமுதாய முன்னேற்றத்தின் முக்கிய அடையாளமாகும். பெண்கள் அரசியலில் ஈடுபடும்போது, பெண்கள் மற்றும் குழந்தைகளுக்கான பிரச்சினைகள் சட்ட ரீதியாக பேசப்படுகின்றன. சில நாடுகளில் பெண்கள் அமைச்சர்களாகவும், நாடாளுமன்ற உறுப்பினர்களாகவும், அரசுத் தலைவர்களாகவும் பதவி வகித்து வருகின்றனர். இருப்பினும், அரசியல் துறையில் ஆணாதிக்க மனப்பாங்கு, பாதுகாப்பு குறைபாடு, சமூக விமர்சனங்கள் போன்றவை பெண்களின் அரசியல் பங்கேற்புக்கு தடையாக உள்ளன. பெண்கள் அரசியலில் ஈ டுபட வேண்டிய அவசியம் இன்றைய சமுதாயத்திற்கு மிக முக்கியமானதாகும்.

ஊடகங்கள் சமூக சிந்தனையை வடிவமைக்கும் சக்தி கொண்டவை. இன்றைய ஊடகங்களில் பெண்கள் சில நேரங்களில் சாதனையாளர்களாக, தலைமைப் பொறுப்புகளில் உள்ளவர்களாக காட்டப்படுவது ஒரு நல்ல மாற்றமாகும். ஆனால் மறுபுறம், பெண்களை கவர்ச்சி பொருளாகக் காட்டுதல், அவர்களின் அழகை மட்டுமே முன்னிறுத்துதல், வன்முறைச் செய்திகளை பொறுப்பின்றி வெளியிடுதல் போன்ற எதிர்மறை அணுகுமுறைகளும் தொடர்கின்றன. இது சமூகத்தில் பெண்களைப் பற்றிய தவறான பார்வையை உருவாக்குகிறது. எனவே ஊடகங்கள் பெண்களை மதிப்புடன், பொறுப்புடன் பிரதிநிதித்துவப்படுத்த வேண்டியது அவசியமாகும்.

பெண்களின் பாதுகாப்பிற்காக பல சட்டங்கள் உருவாக்கப்பட்டுள்ளன. குடும்ப வன்முறை தடுப்பு சட்டங்கள், பாலியல் தொந்தரவு எதிர்ப்பு சட்டங்கள், சொத்துரிமை சட்டங்கள் போன்றவை பெண்களின் உரிமைகளை பாதுகாக்கும் நோக்கில் அமைக்கப்பட்டுள்ளன. ஆனால் சட்டங்கள் இருந்தும் அவை நடைமுறையில் முழுமையாக செயல்படாத நிலை காணப்படுகிறது. சட்ட அறிவு இல்லாமை, சமூக அழுத்தங்கள், நீதிமன்ற தாமதங்கள் போன்றவை பெண்கள் நீதியைப் பெறுவதில் தடையாக உள்ளன. எனவே சட்டங்களுடன் சேர்ந்து சமூக விழிப்புணர்வும் அவசியமாகிறது.

பெண்ணியம் என்பது ஆண்களுக்கு எதிரான சிந்தனை அல்ல, பெண்களுக்கு சம உரிமை கோரும் ஒரு சமூக இயக்கமாகும். பெண்ணியம் பெண்களின் குரலை உயர்த்தி, சமத்துவ சிந்தனையை சமூகத்தில் பரப்புகிறது. சிலர் பெண்ணியத்தை தவறாகப் புரிந்து கொள்வதால் சமூக முரண்பாடுகள் உருவாகின்றன. உண்மையில் பெண்ணியம் ஆண்–பெண் இருவரும் சமமாக வாழும் சமூகத்தை உருவாக்குவதே ஆகும்.

இன்றைய பெண்கள் பல முன்னேற்றங்களை அடைந்திருந்தாலும், பாலினப் பாகுபாடு, வன்முறை, பாதுகாப்பின்மை, இரட்டைச் சுமை போன்ற சவால்களை தொடர்ந்து எதிர்கொண்டு வருகிறார்கள். இந்தச் சவால்களை சமுதாயம் ஒருங்கிணைந்து எதிர்கொள்ள வேண்டும். பெண்களின் முன்னேற்றம் என்பது பெண்களின் வெற்றி மட்டுமல்ல, அது சமூகத்தின் முழுமையான வளர்ச்சியாகும்.

அத்தோடு குடும்பத்தின் நல்வாழ்வில் பெண்களின் பங்கு மிக முக்கியமானது. குறிப்பாக, தாய்மார்கள் தங்கள் குழந்தைகளுக்குக் கல்வியின் அவசியம், பாலின சமத்துவம், ஆரோக்கியமான பழக்கவழக்கங்கள் போன்றவற்றை வீட்டிலேயே பயிற்றுவித்து ஒரு முற்போக்கான சமுதாயத்தை உருவாக்க உதவுகிறார்கள். இருப்பினும் இன்றைய சமுதாயத்தில் பெண்கள் பல்வேறுபட்ட சவால்களை எதிர் கொள்கின்றனர்.

குறிப்பாக பெண்களின் முன்னேற்றம் ஒரு பக்கம் இருந்தாலும், அவர்களைப் பின்னிழுக்கும் பல சவால்கள் இன்னமும் வேரூன்றித்தான் இருக்கின்றன.அதாவது பெண்களுக்கு எதிரான பாலியல் வன்முறைகள், வரதட்சணைக் கொடுமைகள் போன்ற கொடூரங்கள் இன்றும் தொடர்ந்து கொண்டிருக்கின்றன. குறிப்பாக பணிபுரியும் இடங்களிலும், பொதுப் போக்குவரத்துகளிலும், தெருக்களிலும் பெண்களுக்குப் பாதுகாப்பற்ற சூழல் நிலவுவது அவர்களின் சுதந்திரமான நடமாட்டத்திற்குத் தடையாக உள்ளது.

​மேலும் ஒரு பெண் தனது அறிவாற்றலால் அல்லது திறமையால் முன்னேறும் போது அவளை நேரடியாக வீழ்த்த முடியாதவர்கள் அவளது நடத்தையைப் பற்றியோ அல்லது ஒழுஏஐக்கத்தைப் பற்றியோ தவறாகப் பேசுவது சமுதாயத்தில் இன்றும் காணப்படும் ஒரு பிற்போக்குத்தனமான அணுகுமுறையாகும்.

இது தவிர “பெண்கள் இதுதான் செய்ய வேண்டும், இது செய்யக் கூடாது’ என்ற ஆணாதிக்கச் சிந்தனை சமூகத்தில் ஆழமாகப் பதிந்துள்ளது. எனவே தான் பெண்களின் நிலையை மேலும் மேம்படுத்தவும், அவர்களுக்கு முழுமையான சமத்துவத்தை உறுதி செய்யவும் பின்வரும் நட வடிக்கைகளை மேற் கொள்ள வேண்டும். குறிப்பாக ஆண், பெண் சமம் என்ற கருத்தை வீடுகளிலிருந்தே குழந்தைகளுக்குக் கற்பிக்க வேண்டும்.

பாலின சமத்துவம் குறித்த விழிப்புணர்வை ஆரம்பக் கல்வியிலேயே ஏற்படுத்த வேண்டும்,பெண்களுக்குப் பாதுகாப்பளிக்கும் சட்டங்கள் கடுமையாக்கப்படுவதுடன், அவை விரைவாகவும், முறையாகவும் நடைமுறைப்படுத்தப்பட வேண்டும். பாலியல் வன்முறைகளுக்கு எதிராகக் கடுமையான தண்டனைகள் வழங்கப்படுவதோடு பெண்களின் பிரச்சினைகள் மற்றும் தேவைகள் பொதுவெளியில் பேசப்பட்டு, அவற்றிற்கு முன்னுரிமை அளிக்கப்பட வேண்டும், ஊடகங்கள் பெண்களின் சாதனைகளை அதிக அளவில் வெளிச்சத்திற்குக் கொண்டு வர வேண்டும், பெண்களுக்குச் சம ஊதியம், சொத்துரிமை, தொழில் தொடங்கும் வாய்ப்புகள் போன்றவை உறுதிப்படுத்தப்பட வேண்டும். எனவே தான் இவ்வாறான செயற்பாடுகள் மூலம் பெண்கள் சமூகத்தின் பிற்போக்கான சிந்தனைகளிலிருந்து வெளி வர முடியும்.

​எனவே தான் மேற்குறிப்பிட்ட விடயங்களை தொகுத்து நோக்குகின்ற பொழுது இன்றைய சமுதாயத்தில் பெண்கள், சமூக கட்டுப்பாடுகளையும், நவீன சவால்களையும் ஒருசேர எதிர்கொண்டு பயணிக்கும் வீராங்கனைகளாக இருக்கிறார்கள். அவர்கள் நாட்டின் வளர்ச்சிக்கு முதுகெலும்பாகச் செயல்படுகிறார்கள்.

கல்வி, வேலைவாய்ப்பில் அவர்கள் அடைந்திருக்கும் முன்னேற்றம் மகத்தானது.ஆயினும், பெண்களுக்கு எதிரான வன்முறைகள், பாதுகாப்பின்மை, பாலின சமத்துவமின்மை போன்ற சவால்கள் இருக்கும் வரை முழுமையான வளர்ச்சி சாத்தியமில்லை. சட்டங்கள், பொருளாதார முன்னேற்றம் ஆகியவற்றுடன் சமுதாயத்தின் மனப்பான்மை மாற்றம் ஒன்றே பெண்களின் நிலையை உயர்த்தும் நிரந்தரத் தீர்வு ஆகும்.

எனவே தான் பெண்களுக்குச் சம வாய்ப்பு, முழுப் பாதுகாப்பு, மரியாதை மற்றும் முடிவெடுக்கும் அதிகாரம் வழங்கப்பட்டால், அவர்கள் தனிமனிதராகவும், சமுதாயத்தின் அங்கமாகவும் மகத்தான உயரங்களை எட்டி, நாட்டை வளர்ச்சிப் பாதையில் அழைத்துச் செல்வார்கள் என்பது குறிப்பிடத்தக்கது.